Sunday, 11 December 2011

ਜੱਟ ਬਣ ਗਏ ਬਾਣੀਏ ਜੀ

Putt Jattan De
ਜੱਟ ਬਣ ਗਏ ਬਾਣੀਏ ਜੀ,
ਬਿਜ਼ਨੈਸ ਖ੍ਹੋਲੇ ਹੱਟੀਆਂ ਪਾਈਆਂ।
ਖਹਿੜਾ ਛੱਡਤਾ ਚਾਦਰੇ ਦਾ,
ਪਾਉਂਦੇ ਪੈਂਟਾ ਲਾਉਂਦੇ ਟਾਈਆਂ।
ਭੁੱਲਗੇ ਗਾਹਲਾਂ ਕੱਢਣੀਆਂ,
ਹੁਣ ਨਾ ਲੈਂਦੇ ਮੁੱਲ ਲੜਾਈਆਂ।
ਜੱਟ ਬਣ ਗਏ ਬਾਣੀਏ………।
ਹਾਂਜੀ ਹਾਂਜੀ ਕਹਿੰਦੇ ਨੇ,
ਮਾਖਿਓ ਮਿੱਠੀ ਬੋਲੀ ਬੋਲਣ।
ਭਾਅ ਪਤਾ ਲਗ ਗਿਆ ਲੌਗਾਂ ਦਾ,
ਬੈਠੇ ਸੌਦਾ ਪੱਤਾ ਤੋਲਣ।
ਨਾਲ ਐਸ਼ਾਂ ਕਰਦੇ ਨੇ,
ਨਾਲ ਕਰਦੇ ਖੂਬ ਕਮਾਈਆਂ।
ਜੱਟ ਬਣਗੇ ਬਾਣੀਏ………।
ਨਾ ਡੱਟ ਖੁੱਲਦੇ ਬੋਤਲਾਂ ਦੇ,
ਨਾ ਹੀ ਖੜਕਣ ਰੋਜ਼ ਗੰਡਾਸੇ।
ਨਾਂ ਸੁਣ ਕੇ ਠਾਣੇ ਦਾ,
ਹੁਣ ਜੱਟ ਹੋ ਜਾਣ ਆਸੇ ਪਾਸੇ।
ਨਾ ਹੁਣ ਵਿਚ ਕਚਹਿਰੀ ਦੇ ,
ਜਾਂਦੇ ਝੂਠੀਆਂ ਦੇਣ ਗਵਾਹੀਆਂ।
ਜੱਟ ਬਣ ਗਏ ਬਾਣੀਏ……….।
ਨਾ ਕੋਈ ਬਲਦ ਜੋੜਦਾ ਏ,
ਨਾ ਕੋਈ ਭੱਤਾ ਲੈ ਕੇ ਜਾਂਦੀ।
ਹੁਣ ਤਾਂ ਜੱਟ ਦੇ ਮੋਬਾਇਲ ਤੇ,
ਜੱਟੀ ਘਰੋਂ ਹੀ ਫੋਨ ਮਿਲਾਂਦੀ।
ਘਰੇ ਆ ਕੇ ਖਾ ਲਓ ਜੀ,
ਰੋਟੀਆਂ ਗਰਮਾ ਗਰਮ ਪਕਾਈਆਂ।
ਜੱਟ ਬਣ ਗਏ ਬਾਣੀਏ……….।
ਦਿਨ ਫਿਰ ਗਏ ਜੱਟਾਂ ਦੇ,
ਚਾਰੇ ਪਾਸੇ ਮੌਜ਼ ਬਹਾਰਾਂ।
ਹੁਣ ਤਾਂ ਘਰ ਘਰ ਜੱਟਾਂ ਦੇ,
ਮੋਟਰਸਾਇਕਲ ਜੀਪਾਂ ਕਾਰਾਂ।
‘ਪੁਰੇਵਾਲ’ ਉਤਰ ਸੁਹਾਗੇ ਤੋਂ,
ਕਰਦੇ ਵਿੱਚ ਵਿਦੇਸ਼ ਕਮਾਈਆਂ।
ਜੱਟ ਬਣ ਗਏ ਬਾਣੀਏ ਜੀ,
ਬਿਜ਼ਨੈਸ ਖ੍ਹੋਲੇ ਹੱਟੀਆਂ ਪਾਈਆਂ।
ਖਹਿੜਾ ਛੱਡਤਾ ਚਾਦਰੇ ਦਾ,
ਪਾਉਂਦੇ ਪੈਂਟਾਂ ਲਾਉਂਦੇ ਟਾਈਆਂ।